Animals' Voice

Здружението за заштита на животните „Гласот на животните“ (ANIMALS' VOICE) е здружение на граѓани создадено за да ги поттикне граѓаните за нивна заложба и јавна борба против секаков вид злоупотреба и искористување на животните од страна на човекот.
Главна цел е да влијаеме и да успееме да ја промениме човековата свест преку информирање на граѓаните за животните и нивната природа– да му покажеме на општеството во кое живееме дека животните се битија кои чувствуваат болка, патење, страв. Веруваме дека сите живи суштества што чувствуваат имаат право на живот и слобода. Цел на „Гласот на животните„ е укинување на сите облици на злоупотреба, мачење и експлоатација на животните од страна на луѓето.

 

1. Здружението е насочено кон укинување и забрана на:
– Убивањето и мачењето на животните без разлика која е целта за тоа. Кланици, лов и риболов, експерименти над животните, одгледување на животните за потребите на сите видови индустрија, искористување на животните од забавни потреби (циркуси, зоолошки градини, хиподроми и сл.) и останати себични човечки потреби.
2. Здружението ќе се залага и за:

– Заштита на напуштените и бездомни животни, овозможување на соодветна помош и обезбедување на нивно сигурно сместување;

– Заштита на сите животни во поединечни случаи на измачување и суровост;

– Заштита на загрозените и заштитени видови во нивната природна средина, како и заштита на видовите кои се дел од трговија и загрозување;
– Промовирање и посочување на вегетаријанство и, пред сѐ, веганство како етички и еколошки одржлив животен стил, едуцирање за вегетаријанството и веганството како здрави облици на исхрана;
– Едукација на граѓаните со цел помирување на човекот и природата;
– Подигање и развивање на еколошката свест и заштита на животната средина.

 

Притоа:
а) Ќе дејствуваме и ќе ја шириме свеста за поврзаноста помеѓу човекот и животните и за нивната вистинска природа како суштества што чувствуваат болка и страв;
б) Ќе организираме едукативни кампањи со кои низ информирање и дружење ќе влијаеме врз свеста за заштитата и правата на животните и нарушувањето на тие права:
– организираме јавни дебати и трибини
– дејствуваме преку медиуми
– дистрибуираме пропагандни материјали
– организираме мирни протести
– организираме потпишување петиции и пишување на протестни писма;

в) Ќе ја информираме домашната и меѓународната јавност за состојбата на животните;
г) Ќе се заложиме за кривично гонење на поединци, групи или институции одговорни за кршење на законите кои ги штитат животните;
д) Со своето дејствување ќе го поддржуваме донесувањето закони кои на животните им гарантираат слобода на живот и слобода според нивниот вид;
ѓ) Ќе информираме и лобираме на градско, државно и интернационално ниво со цел да се слушне прифати и соодветно организира заштитата на животните;
е) Ќе соработуваме со локални, национални или меѓународни организации со кои имаме исти цели и делиме исти заложби.